Osmanlı Hukukunda Şüf'a Hakkı

Mahmiye-i İstanbul’da Sancakdâr Hayreddin mahallesinde sâkin Süleyman Çelebi b. Mustafa meclis-i şer‘-i şerîf-i enverde, mahalle-i mezbûrda sâkin Mehmed Çelebi b. Ahmed mahzarında üzerine da‘vâ ve takrîr-i kelâm edip, mezbûr Mehmed târih-i kitâbdan yedi gün mukaddem mahalle-i mezbûrede vâki‘ bir tarafdan Zümre Hâtun mülkü ve bir tarafdan benim mülk ve bir tarafdan Mustafa Çelebi mülkü ve bir tarafdan tarîk-i hâs ile mahdûd bir oda ve bir köşk ve bir matbah ve cüneyne ve havluyu müştemil mülk menzili, mâliki Süleyman b. Abdullah’dan yüz guruş semen-i medfû‘a iştirâ ve tesellüm edip, benim dahi câr-ı mülâsıkım olan mebî‘i iştirâ eylediğim mahalde taleb ve hakkâniyet ile taleb eylediğimden sonra teslîm-i mebî‘ ve kabz-ı semen bulunmamakla menzil-i mezkûr katına varıp ben şefî‘im da‘vâ-yı şüf‘a dahi ederim deyu taleb edip, ve’l-hâsıl şerâit-i şüf‘aya tamâm-ı ri‘âyet ve işbu hâzırân bi’l-meclis Ali b. Mustafa ve Hasan b. Abdullah nâm kimesneleri işhâd etmişdim. Hâlâ taleb ederim suâl olunup bi tarîki’ş-şüf‘a menzil-i mezbûru bana teslîm edip, vech-i meşrûh üzre verdiği semen-i mezkûru yedimden kabza tenbîh olunmak matlûbumdur dedikde, gıbbe’s-suâl mezbûr Mehmed cevâbında, ben menzil-i mezkûru mâlik-i mezbûr Süleyman b. Abdullah’dan işbu mübâya‘a hücceti [nâtık olduğu üzre] yüz kıt‘a esedî guruş ile min-haysü’l-keyfiyet-i ma‘lûme ve min-haysi’l-kemiyet-i mechûle bir kabza fülûsa iştirâ ve kabûl etmekle, şefî‘-i mezbûrun şüf‘ası sâkıt olmuşdur deyu def‘le mukâbele edicek, isre’l-istintâk ve’l-inkâr mezbûr Mehmed Çelebi’den def‘-i mezbûruna beyyine taleb olundukda, yine mahalle-i mezbûre sükkânından İmâm Mehmed Efendi b. Receb ve Mustafa Efendi b. Mehmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında, fi’l-vâki‘ mezbûr Mehmed Çelebi târih-i mezkûrda menzil-i mahdûd-ı mezkûru mezbûr Süleyman b. Abdullah nâm kimesneden bizim huzûrumuzda yüz kıt‘a esedî guruş ile min-haysü’l-keyfiyet-i ma‘lûme ve min-haysi’l-kemiyet-i mechûle bir kabza fülûsa iştirâ ve kabûl edip, bu …