Osmanlı Hukukunda Şüf'a Hakkı

Vilâyet-i Rumeli’de İşkodra sancağına tâbi‘ Bar kazâsı kurâsından İsbiç karyesinde sâkin iken işbu târîh-i i‘lâmdan on iki sene mukaddem fevt olan Devlet-i aliyye teba‘asının Rum milletinden Petro v. Yorgi v. Adam’ın verâseti zevce-i metrûkesi Yorice bt. Yorgi ve sulbî kebîr oğulları Nikola ve Covanni ve sulbiye kebîre kızı Cevakoce’ye münhasıra ve tashîh-i mesele-i mîrâsları kırk sehmden olup sihâm-ı merkûmeden beş sehmi zevcesi merkûmeye ve on dörder sehmden cem‘an yirmi sekiz sehmi oğulları merkûmâna ve yedi sehmi dahi kızı merkûmeye isâbeti tahakkukundan sonra sâhib-i arzuhâl ibn-i merkûm Nikola mahfil-i şer‘iyyâtda derûn-ı arzuhâlde mastûrü’l-ism yine teba‘a-i Devlet-i Aliyye’den ve Rum milletinden Yuvan v. Andon muvâcehesinde karye-i mezkûrede vâki‘ bir tarafdan Petro v. Beçko v. Adam’ın samanlığı ve bir tarafdan yine merkûmun bahçesi ve bir tarafdan Nikola v. Petro v. Adam menzili ve taraf-ı râbi‘i tarîk-i âm ile mahdûd iki bâb oda ve bir memşâ ve bir mikdâr havlu ve müştemilât-ı sâire-i ma‘lûmeyi hâvî bir bâb mülk menzil babam ve mûrisimiz müteveffâ-yı merkûmun hayâtında ile’l-vefât müstakillen yedinde malı ve mülkü ve ba‘de-vefâtihî benimle anam ve karındaşlarım gâibûn ani’l-beled merkûmûn Yorice ve Covanni ve Cevakoce’ye mevrûs oldukdan sonra anam ve karındaşlarım gâibûn-ı merkûmûn menzil-i mahdûd-ı mezkûrda ırsen mâlik oldukları cem‘an yirmi altı sehim hisse-i şâyi‘a-i ma‘lûmelerini bundan akdem işbu merkûm Yuvan’a iki bin altı yüz guruş semen-i medfû‘ ve makbûza bey‘ ve temlîk ve teslîm eylediklerinde, ol dahi ber-vech-i muharrer iştirâ ve temellük ve tesellüm ve kabz etmiş ise de ben menzil-i mezkûrun cem‘an yirmi altı sehim hissesinde şefî‘ olup lâkin bey‘-i mezkûru istimâ‘ eylediğim hînde taleb-i muvâsebe ve ittihâd-ı şüf‘a(220)…